कमल कोपिला
३ फाल्गुण कालिकोट । एक समय झाडापखाला महामारीले गाउँका दर्जनौं मानिसको ज्यान लिने, सुत्केरी पीडाले आमाहरू अकालमै मृत्युवरण गर्नुपर्ने कर्णालीको कठोर यथार्थसँग जुध्दै हुर्किएकी सदिक्षा सेजुवालले अब शिक्षित महिला नेतृत्वको नयाँ परिभाषा कोर्ने अठोट लिएकी छिन्।
पचालझरना गाउँपालिका-४ निवासी सदिक्षा राजनीतिक र संघर्षको परिवेशमा हुर्किएकी युवानेत्री हुन्। तीन वर्षको उमेरमै आमाको माया गुमाएकी सदिक्षा समाज परिवर्तनको सपना देख्ने घरपरिवारबाट प्रेरित छिन्। उनका पिता खड्गराज सेजुवाल पूर्वकालमा तत्कालीन राज्य व्यवस्थाविरुद्ध कलम चलाउने एक दृढ व्यक्तित्व हुन्, भने आमा अल्किना बम हाल पचालझरना गाउँपालिकाकी उपाध्यक्षका रूपमा जिम्मेवारी सम्हालिरहेकी छन्।
यही राजनीतिक र संघर्षशील विरासतलाई आत्मसात गर्दै, सदिक्षाले अब राजधानीको त्रिचन्द्र क्याम्पसमा विद्यार्थी स्ववियु निर्वाचनमा सदस्य पदका लागि उम्मेदवारी घोषणा गरेकी छन्। अखिल क्रान्तिकारीको तर्फबाट चुनावी प्रतिस्पर्धामा उत्रिएकी उनले आफ्नो उम्मेदवारी कुनै व्यक्तिगत पद प्राप्तिको लागि नभई न्याय, समानता, र विद्यार्थी अधिकारको लडाइँ भएको स्पष्ट पार्दै भनिन्-“हिजो हामीलाई पछाडि पार्नेहरूले आज पनि हामीलाई रोक्न खोजिरहेका छन्। तर अब समय आएको छ, शिक्षित महिला नेतृत्वलाई बलियो बनाउने।”
कर्णालीको विकट भेगबाट राजधानी छिरेकी सदिक्षाले विज्ञान विषयमा अध्ययन गरिरहेकी छिन्। उनको प्राथमिकता क्याम्पसमा पारदर्शी शिक्षा प्रणालीको स्थापनासँगै भ्रष्टाचारमुक्त, विद्यार्थीमैत्री वातावरण निर्माण गर्नु रहेको छ। विशेष गरी, विकट क्षेत्रबाट अध्ययन गर्न राजधानी आएका विद्यार्थीहरूको समस्या समाधानमा स्ववियु प्रभावकारी बन्नुपर्ने उनको धारणा छ।
महिला सशक्तिकरणलाई नयाँ उचाइमा पुर्याउने लक्ष्यसहित चुनावी मैदानमा उत्रिएकी सदिक्षाले स्ववियु जितेमा विद्यार्थी अधिकारको सुनिश्चितता, शिक्षामा समान पहुँच, र स्ववियुको सशक्त भूमिका स्थापित गर्ने प्रतिज्ञा गरेकी छन्। क्याम्पसमा परिवर्तनको ज्योति बाल्ने संकल्पसहित अघि बढेकी सदिक्षा अब विद्यार्थीहरूको विश्वास जित्न प्रतिबद्ध देखिन्छिन्।
स्रोत : रेडियो प्रदेश आवाज ।
About Author
