नरहरिनाथ गाउँपालिकाले जनता माध्यमिक विधालय रुप्सामा सञ्चालन भइरहेको एसईई परीक्षा केन्द्रको अनुगमन गरेको छ । अनुगमन टोलीमा गाउँपालिकाका अध्यक्ष नगेन्द्र बहादुर बिस्ट, शिक्षा शाखाका स्रोत शिक्षक धनकृष्ण पाण्डे, प्रशासन शाखा प्रमुख टेक बहादुर महतारा, शिक्षक महासंघ नरहरिनाथका अध्यक्ष शेर बहादुर बिस्ट, पत्रकार तथा अन्य सरोकारवाला व्यक्तिहरूको सहभागिता रहेको थियो ।
अनुगमनको क्रममा परीक्षा केन्द्रको समग्र व्यवस्थापन, शिक्षक व्यवस्थापन तथा शैक्षिक सुधारका उपायहरूबारे व्यापक छलफल गरिएको थियो । विगतमा नरहरिनाथकै कमजोर परीक्षा केन्द्रका रूपमा चिनिएको जनता मावि, रुप्सा परीक्षा केन्द्र यस वर्ष उल्लेखनीय रूपमा सुधार भएको सहभागीहरूले बताएका छन् । मान्छेको भीड अत्यधिक कम हुँदा विगतका वर्षहरूको तुलनामा स्थानीय व्यवसायमा असर परेको व्यवसायीहरूले बताएका छन्।
गाउँपालिकाका अध्यक्ष बिस्टले शिक्षा क्षेत्रमा उल्लेखनीय सुधार गर्दै विद्यार्थीहरूलाई राम्रो वातावरण उपलब्ध गराउने प्रतिबद्धता व्यक्त गरेका छन। परीक्षा शान्त, सुव्यवस्थित र भयरहित वातावरणमा सञ्चालन भइरहेको अनुगमनका क्रममा प्रहरी सहायक निरीक्षक विनोद बुढाले जानकारी गराएका छन् । परीक्षा प्रभावकारी बनाउन स्रोत शिक्षक पाण्डेले शिक्षक, विद्यार्थी तथा अभिभावकहरूसँग सहकार्य गर्न अनुरोध गरेका छन् ।
सो अवसरमा विद्यालयको विद्यमान समस्याहरू र परीक्षा सञ्चालनको अवस्थाबारे विद्यालयका प्रधानाध्यापक तथा केन्द्राध्यक्ष अमर बुढाले अनुगमन टोलीलाई जानकारी गराएका हुन । अनुगमनका क्रममा स्थानीय कुलो तथा बहुप्रतिक्षित रुप्सालाई जोड्ने सडक निर्माणका विषयमा समेत छलफल गरिएको थियो । कुलो सुधारका लागि पहल गर्ने र रुप्सा जोड्ने सडक निर्माण छिट्टै सम्पन्न गरिने गाउँपालिकाका अध्यक्ष बिस्टले जानकारी दिएका छन् । हालसम्मका प्रगतिहरू सकारात्मक रहेका र केही बाँकी कामहरू छिट्टै सम्पन्न हुने उनको भनाइ छ । यस सडक निर्माण सम्पन्न भएपछि रुप्सा क्षेत्रको आर्थिक, सामाजिक तथा शैक्षिक विकासमा ठूलो टेवा पुग्ने स्थानीयबासीहरूको विश्वास रहेको छ।
About Author
