कमल कोपिला
११ फाल्गुण कालिकोट । नेकपा (एमाले) नरहरिनाथ गाउँकमिटीको आयोजनामा नेकपा एमाले जिल्ला कमिटी सल्लाहकार परिषद सदस्य, साबिक कुमालगाउँ गाविसका पूर्वअध्यक्ष एवं गाउँ पञ्चायतका उपप्रधान रहनुभएका लाल बहादुर बुढाको शोक सभा आयोजना गरिएको छ।
सो कार्यक्रममा नेकपा एमाले जिल्ला उपाध्यक्ष टेक बहादुर बुढाको विशेष उपस्थिति रहेको थियो। साथै, नेकपा एमाले गाउँकमिटीका पदाधिकारी तथा सदस्यहरू, अग्रज नेता कार्यकर्ता, जनवर्गीय संगठनका प्रमुख तथा प्रतिनिधिहरूको उल्लेखनीय सहभागिता रहेको थियो। शोक सभामा सहभागीहरूले बुढाको फोटोमा अबिरग्रहण तथा फूलमाला अर्पण गर्दै उहाँप्रति श्रद्धाञ्जली व्यक्त गरे।
लाल बहादुर बुढा लामो समयदेखि नेकपा (एमाले) मा सक्रिय रहँदै राजनीतिमा योगदान पुर्याइरहनुभएको थियो। उहाँले आफ्नो जीवन गाउँ र समाजको सेवामा समर्पित गर्नुका साथै पार्टी संगठन निर्माण, परिचालन तथा सुदृढीकरणमा महत्वपूर्ण भूमिका निर्वाह गर्नुभएको थियो। जीवनको उत्तरार्धमा समेत उहाँ पार्टी सुदृढीकरणका लागि पूर्ण रूपमा समर्पित रहनुभएको थियो।
शोक सभामा वक्ताहरूले लाल बहादुर बुढाले देखाएको त्याग, समर्पण र पार्टीप्रतिको निष्ठा स्मरण गर्दै उहाँको योगदानलाई उच्च सम्मान प्रकट गरेका थिए। पार्टीका नेता तथा कार्यकर्ताहरूले उहाँको स्मृतिलाई चिरस्थायी बनाउने प्रतिबद्धता व्यक्त गरे।
यसैबीच, नेकपा एमाले नरहरिनाथ गाउँकमिटीको टोली आजै बुढाको परिवारलाई भेट्न जाने कार्यक्रम रहेको गाउँकमिटी सचिव प्रदीप बोहराले जानकारी दिनुभयो। उहाँका अनुसार, पार्टीका तर्फबाट दिवंगत आत्माप्रति श्रद्धाञ्जली अर्पण गर्दै परिवारजनलाई गहिरो समवेदना व्यक्त गरिनेछ।
About Author
