कमल कोपिला
२० चैत्र २०८१ कालिकोट । जिल्लाको नरहरिनाथ गाउँपालिकाको वडा नं ४ अदेलाका नयाँराम सहकारीको कुकुर पार्भो भाइरसबाट संक्रमित भएपछि गाउँपालिकाकै पशु स्वास्थ्य शाखामा उपचार भइरहेको छ । चार दिनअघि बिरामी परेको उक्त कुकुरलाई गाउँपालिकाको पशु स्वास्थ्य शाखामा ल्याइ उपचार गराइरहेको सहकारीले बताउनुभयो।
नायब पशु स्वास्थ्य प्राविधिक हिक्मत बहादुर सहकारीका अनुसार, पार्भो भाइरस हावाको माध्यमबाट कुकुर तथा बिरालोमा सर्ने अत्यधिक संक्रामक रोग हो । यस रोगका कारण कुकुरहरूमा वान्ता, झाडापखाला, ज्वरो, भोक नलाग्ने र कमजोरी हुने लक्षण देखिन्छ । विशेष गरी यो रोग नवजात तथा कमजोर प्रतिरोधी क्षमताका कुकुरहरूमा गम्भीर रुपमा देखा पर्छ ।
पछिल्लो समय नरहरिनाथ गाउँपालिकामा पार्भो भाइरसको संक्रमण व्यापक रूपमा फैलिएको छ । गाउँपालिकाको पशु स्वास्थ्य शाखाका अनुसार हालसम्म धेरै कुकुर बिरामी परिसकेका छन्, जसका कारण कुकुर पालकहरू चिन्तित भएका छन् । यस भाइरसको संक्रमण रोकथामका लागि पशु स्वास्थ्य शाखाले कुकुर पालकहरूलाई सतर्क रहन आग्रह गर्दै नियमित रूपमा कुकुरको सरसफाइ, उचित आहार तथा आवश्यक खोप लगाउन अनुरोध गरेको छ।
गाउँपालिकाका कार्यवाहक अध्यक्ष कटक बहादुर बुढाका अनुसार, “पार्भो भाइरसको संक्रमण नरहरिनाथमा महामारिको रूपमा फैलिएको छ। अहिले गाउँपालिकामा पर्याप्त खोप नभएको कारणले संक्रमित कुकुरहरूको उपचार गाउँपालिकाकै पशु स्वास्थ्य शाखाबाट भइरहेको छ। हामी छिट्टै खोप उपलब्ध गराउने प्रयासमा छौं।”
नरहरिनाथ गाउँपालिकाले भाइरस नियन्त्रणका लागि सचेतनामूलक सूचना प्रकाशन तथा प्रसारण गर्ने योजना बनाएको छ। साथै, सम्भावित संक्रमित कुकुरहरूको जाँच र उपचार सेवा निरन्तर प्रदान गरिने जनाइएको छ।
त्यस्तै, गाउँपालिकाभर भेडाबाख्राका लागि पिपिआर खोप र रेबीजविरुद्धको खोप अभियान भोलिदेखि सञ्चालन गरिने भएको छ। गाउँपालिकाले सबै पशुपालकहरूलाई खोप अभियानमा सहभागी भई आफ्ना भेडा र बाख्रालाई सुरक्षित बनाउन अनुरोध गरेको छ । गाउँपालिकाका विभिन्न ठाउँमा भोलीदेखि सुरु हुँदै छ ।
About Author
कमल कोपिला
कमल कोपिला कालिकोटमा जन्मिएर पत्रकारिता गर्दछन। उनि नेपाल पत्रकार महासंघ कालिकोटको उपाध्यक्ष हुन । कालिकोटको स्थानीय तह नरहरिनाथ गाउँपालिका द्वारा संञ्चालित रेडियो सुनथराली एफ एमका स्टेसन म्यानेजर पनि हुन।
