कमल कोपिला
२१ चैत २०८१ कालिकोट । जिल्लाको नरहरिनाथ गाउँपालिकाले सामाजिक सुरक्षा भत्ता वितरण प्रक्रियामा प्रविधि सुधार गर्दै बायोमेट्रिक प्रणाली लागू गर्ने कार्य सुरु गरेको छ।
अब १६ वर्ष माथिका लाभग्राहीहरूले भत्ता प्राप्त गर्न पहिलो पटक बायोमेट्रिक प्रमाणीकरण गर्नुपर्नेछ । सो प्रणालीमार्फत लाभग्राहीको औँठाछाप तथा व्यक्तिगत विवरण डिजिटल रूपमा अभिलेख गरिनेछ । भत्ता वितरणलाई पारदर्शी, विश्वसनीय र प्रभावकारी बनाउने लक्ष्य राखिएको छ । एकपटक बायोमेट्रिक प्रमाणीकरण गरिसकेपछि देशभरका जुनसुकै स्थानीय तहबाट सामाजिक सुरक्षा भत्ताको नविकरण गर्न सकिने सुविधा रहने नरहरिनाथ गाउँपालिकाका सुचना प्रविधि अधिकृत भरत कठायतले जानकारी दिनुभयो ।
गाउँपालिकाका अनुसार, नक्कली लाभग्राही पहिचान गर्ने, दोहोरो दाबी रोक्ने र वास्तविक लाभग्राहीलाई समयमा भत्ता उपलब्ध गराउने उद्देश्यले यो प्रविधि लागू गरिएको हो ।
स्थानीय बासिन्दाहरूले प्रविधिको स्वागत गर्दै भत्ता वितरण प्रक्रियामा देखिने अनियमितता हट्ने विश्वास व्यक्त गरेका छन् । गाउँपालिकाले आगामी केही दिनभित्र सबै लाभग्राहीको विवरण प्रमाणीकरण गरी नियमित भुक्तानी प्रणालीलाई व्यवस्थित बनाउने जनाएको छ ।
हरेक वर्ष श्रावण देखि भाद्र मसान्तसम्म हुने नविकरणलाई सहज पारदर्शी बनाउन लाभग्राहीहरुले अनिवार्य रुपमा २०८२ साल बैशाख मसान्त भित्र बायोमेट्रिक रुजु गरि सक्नुपर्ने बताईएको छ । साथै हाल वायोमेट्रिक रुजु नगरि पछि नबिकरण गर्न समस्या भएमा लाभग्राही स्वंयम जवाफदेही हुनु पर्ने पनि बताईएको छ ।
About Author
