कमल कोपिला
२२ चैत्र कालिकोट । जिल्लाको नरहरिनाथ गाउँपालिकामा निःशुल्क बृहत् स्वास्थ्य शिविर सञ्चालन हुने भएको छ। ‘स्वास्थ्य नै सम्पत्ति हो’ भन्ने उद्देश्य सहित एक एक पाइला फाउण्डेशन र नरहरिनाथ गाउँपालिकाको संयुक्त आयोजनामा २०८१ साल चैत्र २४ गतेदेखि २६ गतेसम्म तीन दिने स्वास्थ्य शिविर सञ्चालन गर्न लागिएको हो।
नरहरिनाथ गाउँपालिका वडा नं. ३, डाँडामाडु कुमालगाउँस्थित योगी नरहरिनाथ आधारभूत अस्पतालमा सञ्चालन हुने शिविरमा विशेषज्ञ चिकित्सकहरूको टोलीद्वारा १४ वटा विभिन्न स्वास्थ्य सेवाहरू निःशुल्क प्रदान गरिने आयोजकले जनाएका छन् ।
शिविरमा आँखाको उपचार (मोतिबिन्दुको शल्यक्रिया सहित), जनरल मेडिसिन, स्त्री तथा प्रसूति रोग, नाक, कान, घाँटी रोग तथा शल्यक्रिया, छाला रोग, हाडजोर्नी तथा जोर्नीसम्बन्धी सेवा, दन्त सेवा, बालरोग, कलेजो रोग, फार्मेसी, प्याथोलोजी, रेडियोलोजी र ईन्डोस्कोपी सेवा प्रदान गरिनेछ। शिविर बिहान ९ बजेदेखि सञ्चालन हुनेछ भने सहभागी हुन कुनै शुल्क लाग्ने छैन र सबै उमेर समूहका नागरिकहरूले सेवा लिन सक्नेछन् ।
गाउँपालिकाका अध्यक्ष नगेन्द्र बहादुर बिस्टले स्वास्थ्यलाई उच्च प्राथमिकतामा राख्दै यस्तो शिविर आयोजना गरिएको बताए । “हामी स्वास्थ्य सेवामा सबैको पहुँच सुनिश्चित गर्न चाहन्छौं । गाउँमै विशेषज्ञ सेवा ल्याउनु चुनौतीपूर्ण भए पनि आवश्यक छ, र यस्ता शिविरले ग्रामीण बासिन्दाको स्वास्थ्य अवस्था सुधारमा उल्लेखनीय योगदान पुर्याउँछ,” अध्यक्ष बिष्टले भने।
गाउँपालिकाका स्वास्थ्य शाखा प्रमुख मान बहादुर सहकारीले यस्ता शिविरहरू ग्रामीण जनताको लागि अत्यन्त उपयोगी हुने बताए । “समयमै रोगको पहिचान र उपचार पाउनुले जनस्वास्थ्यमा दीर्घकालीन सुधार ल्याउँछ। स्थानीय तहमा जनताको जीवनस्तर उकास्न यस्ता कार्यक्रमले सकारात्मक प्रभाव पार्छ,” सहकारीले भने।
योगी नरहरिनाथ आधारभूत अस्पतालका चिकित्सक डा. शिवनाथ यादवले शिविर उपचार मात्र नभई जनचेतना अभिवृद्धि गर्ने अवसर भएको बताए। “ग्रामीण क्षेत्रमा अझै पनि रोग लुकाउने प्रवृत्ति छ, जसले समस्या जटिल बनाउँछ। यस्तो शिविरले उनीहरूलाई सहज, सुरक्षित र सम्मानजनक उपचार वातावरण दिन्छ र रोग नलुकाईन खुलेर डाक्टर हरुलाई भन्न आग्रह छ र यस्तो बृहत् शिविरमा समयमा पालो नआउन सक्ने अवस्था भएमा अर्को दिनको लागि पर्खेर अनिवार्य उपचार गराउनहुन तथा कुनै प्रकारको हो-हल्ला नगर्न अनुरोध छ । शान्त र भयरहित ढंगले सबैले निशुल्क उपचार सेवा लिनु पर्छ,” डा. यादवले अनुरोध गरे।
शिविरको व्यवस्थापन, विशेषज्ञ परिचालन तथा आवश्यक सामग्री आपूर्तिको सबै तयारी भईरहेको आयोजक पक्षले जनाएको छ । आयोजकले सम्पूर्ण नागरिकलाई शिविरमा सहभागिता जनाई स्वास्थ्य परीक्षण गराई लाभ लिन अनुरोध गरेका छन्।
About Author
