कमल कोपिला
२२ चैत्र कालिकोट । स्वास्थ्य सेवा दुर्गम बस्तीसम्म पुर्याउने उद्देश्यले कालिकोटको महावै गाउँपालिकामा सञ्चालन गरिएको दुई दिने विशेषज्ञ स्वास्थ्य शिबिर सफलतापूर्वक सम्पन्न भएको छ। एकीकृत जनस्वास्थ्य अभियान तथा विशेषज्ञ स्वास्थ्य शिविरमार्फत महावैका ६६९ जना नागरिकले विभिन्न स्वास्थ्य सेवा निःशुल्क रूपमा प्राप्त गरेका छन् ।
चैत्र २१ र २२ गते सञ्चालन भएको शिविरमा हाडजोर्नी तथा नसा रोग, स्त्री तथा गर्भवती / प्रसुती रोग, बालरोग विशेषज्ञ सेवा, सामान्य स्वास्थ्य परिक्षण, परिवार नियोजन र निदान सेवा, क्षयरोग कुस्ठरोग, मनोसामाजिक परामर्श, एचआईभी तथा यौन रोग लगायतका उपचारहरू प्रदान गरिएको थियो। वृद्धवृद्धा, बालबालिका, गर्भवती महिला तथा अन्य बयस्कहरूलाई सहज र प्रभावकारी रूपमा सेवा दिन सकिएको आयोजकहरूले जनाएका छन्।
शिविर स्वास्थ सेवा कार्यालय कालिकोट, महावै गाउँपालिका स्वास्थ्य शाखा, महावै आधारभूत अस्पताल, ओदा फाउन्डेसन र प्रदिया फाउन्डेसनको संयुक्त सहकार्यमा सम्पन्न भएको हो । गाउँमै सेवा प्राप्त गर्दा नागरिकलाई सदरमुकाम धाउनुपर्ने झन्झट हटेको भन्दै गाउँपालिका अध्यक्ष खेम बहादुर सिंहले शिविरलाई प्रभावकारी र सफल भएको बताएका छन् ।
स्थानीय तहको नेतृत्वमा स्वास्थ्यजस्तो संवेदनशील क्षेत्रमा देखिएको यस्तो सक्रियता प्रशंसनीय छ । विशेषगरी दुर्गम भेगका नागरिकलाई राज्य सेवामा सहभागी गराउने र उनीहरूको जीवनस्तरमा प्रत्यक्ष प्रभाव पार्ने यस्ता कार्यक्रमहरू निरन्तर हुनु अपरिहार्य देखिन्छ।
अध्यक्ष सिंहले अबको चरणमा चैत्र २६ र २७ गते आँखा उपचार शिविरको आयोजना गरिने जानकारी दिँदै, स्थानीय तह र साझेदार संस्थाबीचको सहकार्यले स्वास्थ्य क्षेत्रलाई अझ सुदृढ बनाउने विश्वास व्यक्त गरेका छन् ।
About Author
